Kryeministri Edi Rama zhvilloi një intervistë për podcastin “East Side Stories” në median austriake, Die Presse.

Kreu i qeverisë shqiptare ka folur për gjithçka, që nga negociatat për anëtarësim në BE, lufta kundër korrupsionit, SHBA-të dhe Rusinë.

I pyetur drejtpërdrejtë nga gazetari Thomas Seifert se pse Europa duhet ta ketë Shqipërinë brenda, Rama u përgjigj se kjo lidhet edhe me sigurinë dhe unitetin e europës

“Është shumë, shumë e veçantë në histori të kemi këtë realitet gjeopolitik të Bashkimit Evropian: dy kufij, një kufi i jashtëm dhe një kufi i brendshëm. Dhe në këtë rast, kufiri i brendshëm është Ballkani Perëndimor. Pra, për arsye që lidhen me sigurinë e Evropës, koalicionin e evropianëve, unitetin e Evropës, është e qartë, të paktën për mua, se nuk ka mënyrë tjetër veçse të integrohen vendet e Ballkanit Perëndimor brenda Bashkimit Evropian”, tha ai.

Sipas kryeministrit shqiptar sot situata në Europë ka ndryshuar, pasi sipas tij më parë, BE-ja e kishte humbur vëmendjen ndaj së ardhmes dhe rëndësisë strategjike të zgjerimit, të cilin preferon ta quajë unifikim. Këtu komentoi edhe vetot që merrte më parë Shqipëria, ndër to edhe nga Franca për hapjen e negociatave.

“Tani kohët janë të ndryshme. Shumë gjëra kanë ndryshuar. Së pari dhe më kryesorja, ka ndryshuar niveli i sigurisë së Bashkimit Evropian ndaj vetes së tij. Për momentin, Bashkimi Evropian nuk është aq i vetë-mjaftueshëm sa ndihej disa vite më parë. Shpresoj që të mbetet kështu dhe të mos ndryshojë, sepse gjërat përsëri ndryshojnë”, tha Rama.

Ai i qëndron angazhimit për anëtarësim brenda vitit 2030 edhe gjatë bisedës me Die Presse. Rama thekson se kjo nuk është e thënë thjesht nga Shqipëria, por se ka marrë mbështetje të madhe edhe nga Komisioni Europian.

“A do të jemi si Austria brenda dy vitesh? Po ju them jo. Aspak. Por anëtarësimi lidhet me disa parime dhe kritere shumë të qarta dhe specifike që duhet të përmbushësh në tërësi. Dhe lufta për këtë apo atë çështje është një histori që nuk mbaron kurrë për të gjithë. Pra, do të vazhdojmë më pas. Por siç janë gjërat tani, nuk shoh asnjë rrezik për probleme serioze në këtë fazë. Por më vonë, sigurisht, do të duhet të bëjmë më shumë”, tha ai.

Kreu i qeverisë shqiptare vlerëson më së shumti nga negociatat me BE-në, procesin e transferimeve të njohurive. Sipas tij, në këtë fushë, BE-së nuk krahasohet me askënd tjetër.

“Nuk e bëjmë këtë “detyrë shtëpie” për t’i kënaqur ata. E bëjmë këtë detyrë për të ndryshuar Shqipërinë dhe për ta bërë Shqipërinë më evropiane, më demokratike, më të bazuar në institucionet e veta dhe jo tek personalitetet e veta… etj. Pra, Bashkimi Evropian është burimi i vetëm i këtij lloji njohurish. Nuk e gjen askund tjetër. Marr shembullin e Afganistanit ose Irakut. Ata dështuan shumë sepse nuk kanë perspektivën e Bashkimit Evropian dhe sepse askush tjetër nuk mund t’i mësojë një vendi të ndërtojë institucione. Amerikanët nuk kanë durim për këtë. Ata kanë filozofinë e të rregullosh gjërat me bomba dhe pastaj të predikosh. Por… procesi i gjatë është diçka që vetëm Bashkimi Evropian e di si ta bëjë. Dhe diçka që vetëm Bashkimi Evropian e ka, të themi, nuk mund ta quaj thesar kombëtar, sepse nuk është vetëm një komb, është thesari i këtij kontinenti. Pra, nëse heqim Evropën nga ekuacioni i Shqipërisë, dhe nëse heqim Bashkimin Evropian nga rruga që kemi ndjekur deri tani, dhe përpiqemi të imagjinojmë si do të ishim sot, është diçka krejtësisht e ndryshme. Nuk do të ishim në vendin ku jemi sot nëse nuk do të kishim Bashkimin Evropian, dhe nëse nuk do të kishim dhimbjet e kokës që vijnë me të. Është shumë neurotik të punosh me Bashkimin Evropian. Por në fund, është vërtet shumë përfitues, shumë ndihmues, shumë i shëndetshëm. Është si të marrësh ilaçe të hidhura, por janë ilaçe. Nuk janë helm”, tha Rama.

Nuk munguan pyetjet për Prokurorinë e Posaçme. Kryeministri Edi Rama thotë se e kishte parashikuar diçka të tillë, por theksoi se vendi ka nevojë për ndërtimin e mekanizmave të drejtësisë që mund të provojnë pavarësinë e tyre. Pavarësisht gabimeve që mund të bëjë Struktura e Posaçme, sipas Ramës, pavarësia e tyre nuk duhet prekur.

“Nuk është diçka që nuk e prisja, ose nuk është diçka që po ndodh papritur. Është diçka që e dinim, dhe e kam thënë para se të ekzistonte vetë. Kam thënë se duhet të ndërtojmë mekanizma të drejtësisë që duhet të jenë në gjendje të provojnë pavarësinë e tyre, duke hetuar, duke investiguar dhe duke dënuar, pa marrë parasysh nga cila anë vjen çështja. Nuk është aq këndshme sa të shkosh në operë. Është e dhimbshme. Është e hidhur. Por është mënyra e vetme. A është perfekte? Jo. A bëjnë gjithashtu gabime? Sigurisht që bëjnë. Por në fund të ditës, duhet të bëjmë gjithçka që të mos prekim pavarësinë që u kemi dhënë atyre”, tha ai.

Për gazetarin Seifert tha se projekti për Aeroportin e Vlorës nuk është i dëmshëm dhe se do të hapet vitin tjetër. Ai komentoi edhe projektin e Jared Kushner në Shqipëri.

“Nuk është se e di saktësisht si ndodhi, por ndodhi. Ata erdhën, vizituan, e duan këtë vend, u kthyen dhe pastaj filluan të mendojnë se si të bëjnë diçka”, tha ai.

Ai theksoi se miqësia e tyre nuk është çështje politike dhe se do të mbijetojë përtej mandatit që do të ketë Donald Trump në Shtëpinë e Bardhë.

“Mendoj se ky është një investim dhe kjo është një miqësi që zgjat shumë kohë, prandaj do të mbijetojë edhe pas Trump-it, kështu që nuk është aspak një miqësi politike. Kjo ishte ajo që thashë atëherë, dhe kjo është ajo që po them tani”, tha Rama.

Duke iu referuar përplasjeve politike në SHBA mes Trump dhe Soros, Rama tha se nuk është puna e tij të gjykojë e as të jetë në mes të tyre. Ai theksoi se Shqipëria është shtëpia e të gjithëve.

“Po, më pyetët për Kushner dhe Soros. Po, të dy janë miq. Mund të mos e pëlqejnë njëri-tjetrin, megjithëse nuk jam i sigurt. Megjithatë, bëhet fjalë për ta. Nuk bëhet fjalë për mua. Nuk është puna ime të gjykoj, nuk është puna ime të jem pjesë e kësaj. Kjo është Shqipëria dhe kjo është shtëpia për të gjithë miqtë që kemi. Pra, të dy janë në shtëpi këtu”, tha ai.

Sa i përket marrëdhënieve ndërkombëtare, Rama thekson se ka një rekord të pastër dhe nuk është angazhuar në asnjë lloj përplasjeje ndërkombëtare. Sipas tij, vendi nuk e ka luksin të zgjedhë, por të flasë me të gjithë.

“Kur bëhet fjalë për ne, mendoj se jemi shumë të vegjël për të zgjedhur. Pra, duhet të flasim me të gjithë dhe të jemi në gjendje të kuptojmë sa më shumë të gjithë”, tha ai.

Rama thekson se marrëdhënia mes Shqipërisë dhe Rusisë është ndarë në vitin 1960.

“Kur bëhet fjalë për Rusinë, kemi një marrëdhënie shumë të veçantë për shkak të një historie të veçantë. Pra, jemi ndarë me Rusinë në vitin 1960 sepse ne donim të ruanim Stalinin, ata donin të çliroheshin nga Stalini. Dhe kjo ndodhi. Ne ruajtëm Stalinin, jo Bashkimin Sovjetik për 30 vitet e ardhshme. Dhe kjo krijoi një pakënaqësi shumë të madhe në psikologjinë e popullit tonë për rusët dhe Rusinë. Prandaj, pas 35 vjetësh, të themi, jete demokratike, nuk kemi pasur kurrë një vizitë në Rusi dhe nuk jemi vizituar nga Rusia. Dhe, sinqerisht, nuk na mungon”, tha ai.

Por thekson se Bashkimi Europian nga ana tjetër duhet të flasë vetë me Rusinë dhe të mos e delegojë politikën e vet të jashtme. Arsyeja? Sepse Moska është fqinj i BE-së në fund të fundit.

“Kur bëhet fjalë për Bashkimin Evropian, mendoj se Bashkimi Evropian duhet të flasë me Rusinë. Dhe nuk duhet të vazhdojë t’i delegojë politikën e vet të jashtme në Uashington, sepse në fund të ditës, Rusia është fqinj i Bashkimit Evropian, jo fqinj i Shteteve të Bashkuara. Dhe me fqinjët, duhet të flasësh”, tha Rama. /Tv Klan/