Strategjia për modernizimin dhe harmonizimin e sistemeve të informacionit doganor të Shqipërisë me ato të Bashkimit Evropian për periudhën 2025–2030, e cila u miratua një ditë më parë nga Këshilli i Ministrave, ka për qëllim përmbushjen e standardeve dhe kërkesave të BE-së, duke siguruar një infrastrukturë doganore tërësisht të harmonizuar dhe të avancuar. Ky proces do të mundësojë integrimin e Shqipërisë në tregun e përbashkët evropian, duke e bërë administratën doganore më efikase dhe më transparente.

Strategjia është hartuar nga Drejtoria e Përgjithshme e Doganave, në bashkëpunim me Agjencinë Kombëtare të Shoqërisë së Informacionit dhe UNCTAD, si dhe me asistencën teknike të DG TAXUD.

Dokumenti parashikon zhvillimin e sistemeve kyçe për menaxhimin e procedurave doganore, shkëmbimin e certifikatave, menaxhimin e riskut dhe implementimin e sistemeve të tjera që mbështesin standardet evropiane.

Objektivi kryesor i kësaj strategjie është që deri në vitin 2030, Shqipëria të ketë një sistem doganor tërësisht të harmonizuar me Kodin Doganor të BE-së.

Zbatimi i kësaj strategjie pritet të sjellë përfitime të shumta, duke përfshirë lehtësimin e procedurave doganore, uljen e kohës së zhdoganimit dhe rritjen e efikasitetit operativ.

Po ashtu, kjo do të përmirësojë mundësinë për bizneset shqiptare për të qenë më konkurruese në tregjet ndërkombëtare, pasi do të thjeshtohen procedurat dhe do të ulet kostoja administrative.

Për më tepër, sistemi i avancuar i menaxhimit të riskut do të kontribuoni në forcimin e sigurisë kombëtare, duke parandaluar kontrabandën dhe aktivitetet ilegale ndërkufitare.

Ky modernizim i sistemeve doganore është një hap i rëndësishëm për integrimin e Shqipërisë në Bashkimin Evropian dhe për mbështetje të procesit të anëtarësimit të vendit, duke siguruar një administratë doganore që funksionon në përputhje me standardet e BE-së.

Burimi ATSH