Konferenca dhe Ushtrimi i Simulimit mbi Kërcënimet Hibride në Ballkanin Perëndimor, organizuar nga Qendra Evropiane e Ekselencës Kundër Kërcënimeve Hibride (Hybrid CoE) në bashkëpunim me Autoritetin Kombëtar të Sigurisë Kibernetike (AKSK), u zhvillua në Tiranë nga data 17 deri më 20 nëntor, duke mbledhur mbi 100 pjesëmarrës nga mbarë komuniteti euroatlantik.

Shqipëria iu bashkua qendrës Hybrid CoE në qershor 2024.

Në fjalën e tij, drejtori i përgjithshëm i AKSK-së, Igli Tafa, theksoi se, kërcënimet hibride shfaqen paralelisht me sulmet kibernetike, duke përfshirë dezinformimin, spiunazhin, presionin ekonomik dhe ndikimin psikologjik ndaj qytetarëve.

Ai rikujtoi se Shqipëria është përballur me sulme serioze që synonin shkatërrimin e infrastrukturës digjitale, ndërsa propaganda dhe dezinformimi i shoqëronin për të krijuar destabilitet.

Tafa vuri në dukje se diversiteti politik, kulturor dhe etnik në Ballkanin Perëndimor e bën rajonin më të ndjeshëm ndaj aktorëve keqdashës, ndërsa manipulimi i të dhënave dhe përdorimi i teknologjive të reja, si deepfake, e rrisin rrezikun ndaj shoqërive.

Ai theksoi se faktori njerëzor, edukimi dhe media mbeten thelbësore për të ndërtuar qëndrueshmëri dhe për t’u përballur me këto sfida në një mjedis gjithnjë e më të digjitalizuar.

Në vitet e fundit, Shqipëria dhe vendet e tjera të Ballkanit Perëndimor janë përballur me forma të ndryshme të veprimtarive hibride, përfshirë sulme kibernetike të avancuara, ndërkohë që aktorë shtetërorë dhe joshtetërorë të huaj kanë zgjeruar ndjeshëm ndikimin e tyre ekonomik, politik dhe kulturor.

“Aktorët e kërcënimeve hibride po rrisin ndikimin e tyre në Ballkanin Perëndimor, me një sërë incidentesh të regjistruara gjatë viteve të fundit dhe presim që ky trend të vijojë”, deklaroi Martha Turnbull, drejtore e Komunitetit të Interesit për Ndikimin Hibrid, në Hybrid CoE.

Kjo është hera e dytë që Hybrid CoE organizon një konferencë dhe ushtrim posaçërisht për Ballkanin Perëndimor, me një simulim në kohë reale mbi identifikimin, reagimin dhe mbrojtjen nga kërcënimet hibride.

Qëllimi ishte forcimi i kapaciteteve të shteteve demokratike dhe shoqërive të tyre për t’u përballur me veprimtaritë hibride të ndërmarra nga regjime autoritare.

“Dëshironim ta sillnim këtë aktivitet në Tiranë për t’i dhënë praktikuesve dhe ekspertëve nga Shqipëria si dhe vendeve të tjera të Ballkanit Perëndimor, përfshirë përfaqësues të KFOR-it dhe EULEX-it, si dhe Shteteve Pjesëmarrëse në Hybrid CoE, Bashkimit Evropian dhe NATO-s, mundësinë për të ndarë njohuri, përvoja dhe ekspertizë mbi luftimin ndaj kërcënimeve hibride, si brenda rajonit, ashtu edhe më gjerë”, theksoi Shiho Rybski, drejtore e Trajnimeve dhe Ushtrimeve në Hybrid CoE.

Konferenca mbi Kërcënimet Hibride në Ballkanin Perëndimor dhe Ushtrimi i Simulimit u organizuan nga Qendra Evropiane e Ekselencës Kundër Kërcënimeve Hibride (Hybrid CoE), në bashkëpunim të ngushtë me Autoritetin Kombëtar për Sigurinë Kibernetike të Shqipërisë (AKSK), dhe me mbështetjen e Global Affairs Canada (GAC).

Burimi ATSH