Bashkia e Tepelenës bëri të ditur se gjatë fundjavës, qyteti mirëpriti edicionin e dytë të “Vjosa Wild River International Ultra Trail”, një ngjarje sportive ndërkombëtare që bashkoi qindra vrapues nga Shqipëria dhe vende të ndryshme të botës.

Pavarësisht kushteve atmosferike sfiduese, gara u zhvillua me energji dhe entuziazëm të madh, duke krijuar një atmosferë të gjallë sportive përgjatë brigjeve të lumit Vjosa.

Vrapuesit morën pjesë në disa kategori garash, me distanca që varionin nga 11 km deri në 100 km, përgjatë rrugëtimeve që shpalosën bukuritë natyrore, kulturën dhe mikpritjen karakteristike të zonës së Tepelenës.

Ky aktivitet synon promovimin e turizmit sportiv dhe të qëndrueshëm në rajonin e Vjosës, si dhe nxitjen e njohjes së potencialeve natyrore e kulturore të kësaj zone unike.

Burimi ATSH