Komisioni Qendror i Zgjedhjeve (KQZ) i Shqipërisë vijon të konsolidojë rolin e tij në skenën ndërkombëtare zgjedhore.

Kreu i KQZ, Ilirian Celibashi, në një postim në rrjetet sociale njoftoi sot se ka pritur Sekretarin e Përgjithshëm të AWEB (Shoqata e Autoriteteve Zgjedhore të Botës), In-sik Jang, dhe delegacionit të tij, në vizitën e tij të parë në Shqipëri.

Takimi u zhvillua në prag të mbledhjes dyditore të Komitetit për Ndryshimin e Kartës (CAC) të AWEB, që këtë vit po mbahet në Tiranë.

Gjatë takimit, In-sik Jang theksoi progresin e thellë demokratik të Shqipërisë dhe administrimin cilësor të zgjedhjeve sidomos gjatë viteve të fundit në Shqipëri. Më tej, AWEB shprehu vlerësimin maksimal për rolin vital dhe kontributet thelbësore të KQZ brenda organizatës.

Ky aktivitet ka karakter historik, duke mbledhur përfaqësues nga pesë kontinente për të rishikuar Kartën Kushtetuese të AWEB, ndryshimet e së cilës datojnë 20 vite më parë.