Grupi i Punës për Zgjerimin dhe Vendet Negociuese për Anëtarësim i Këshillit të BE-së, COELA, u takua sot me Kryeministrin Edi Rama, Kryenegociatoren Majlinda Dhuka, Kryetarin e Komisionit Parlamentar për Evropën dhe Punët e Jashtme, Igli Hasani, dhe nënkryetaren Albana Vokshi.

Përmes një postimi në rrjetet sociale zyra e delegacionit të Bashkimit Evropian në vendin tonë shkruan se “BE27 rikonfirmuan seriozitetin dhe angazhimin e tyre për rrugëtimin e Shqipërisë drejt BE-së, një proces që ecën bazuar në meritë dhe në zbatimin e reformave të prekshme dhe të qëndrueshme”.

Aktiviteti vjen në kuadër të një misioni faktmbledhës mbi ecurinë e negociatave të anëtarësimit të Shqipërisë në Bashkimin Europian.

Grupi i Punës për Zgjerimin dhe Vendet Negociuese për Anëtarësim i Këshillit të BE-së (COELA), ndodhet këtë javë në Tiranë, i shoqëruar nga Presidenca daneze e Këshillit të BE-së.

Përfaqësuesit e vendeve anëtare të BE-së do të zhvillojnë takime me institucionet shqiptare për të vlerësuar progresin e reformave dhe për të diskutuar hapat e ardhshëm në procesin e integrimit.

Shqipëria ka hapur 28 kapituj të negociatave në vetëm 11 muaj, teksa 4 kapitujt e fundit u hapën më 16 shtator në Konferencën e 6-të Ndërqeveritare me BE-në.

Burimi ATSH