Ministrja e Punëve të Brendshme, Albana Koçiu e cila mori detyrën sot u shpreh se do të çojë përpara të gjitha punët dhe detyra që kryeministri i ka ngarkuar.

Gjatë prezantimit nga kryeministri Edi Rama, e para grua në krye të punëve të brendshme, Koçiu tha se nën drejtimin e saj institucioni i Ministrisë së Brendshme do të ngrihet në lartësinë e kësaj detyre për të përfaqësuar më së miri gjithë figurën e punonjësit publik.

“Ju me të drejtë listuat një sërë detyrash të Ministrisë së Punëve të Brendshme, të cilat është shumë e vërtetë, janë në ligje, janë në letër, por do duhet të kenë vëmendje akoma më shumë. Janë emergjenca të kohës dhe pikërisht këtë do të bëjmë bashkërisht, dhe gjej rastin t’ju them publikisht sot se Ministria e Punëve të Brendshme, me mua në drejtim dhe ekipin e saj, do të ngrihet në lartësinë e kësaj detyre për ta përfaqësuar më së miri të gjithë figurën e punonjësit publik. Së pari, duke filluar nga secili prej jush këtu, me integritetin me profesionalizmin që duhet të karakterizojë të gjithë punonjësit e Ministrisë së Punëve të Brendshme, për të kryer një sërë funksione të rëndësishme që janë vetë shteti, që krijojnë themelet e një të shteti të fortë demokratik”, nënvizoi Koçiu.

Ministrja shtoi se “duke pasur parasysh edhe rëndësinë e jashtëzakonshme edhe momentin historik ku ndodhet vendi ynë sot, tashmë Evropa nuk është më një vizion, është një realitet i prekshëm, dhe prandaj unë besoj fort se do të çojmë përpara të gjitha këto punë dhe përgjegjësi që Kryeministri dhe legjislacioni na ka ngarkuar dhe të cilat duan patjetër që secili nga ju të ndërmarrë angazhimet e nevojshme për t’i çuar përpara”, u shpreh ministrja.

Ajo shprehu besimin se “kjo është një ministri që do duhet të flasë pak, por të punojë shumë dhe t’i lëmë punët të flasin vetë për ne”.

“Do ja dalim që t’i kryejmë të gjitha punët dhe angazhimet që kryeministri na ka ngarkuar”, e përmbylli fjalën ministrja e Brendshme, Albana Koçiu.

Burimi ATSH