Kryeministri Edi Rama u kërkoi sot ambasadorëve të kërkojnë dhe regjistrojnë në mënyrë të plotë komunitetet shqiptare nëpër botë.

Në fjalën e tij në konferencën 3-ditore të ambasadorëve shqiptarë nëpër botë, Rama tha se është e papranueshme që një vend i vogël si i yni, të mos ketë një regjistër të përditësuar vazhdimisht me shqiptarë të cilët shkëlqejnë në profesionet e tyre, në vendet e huaja.

“Pjesëmarrja e shqiptarëve jashtë atdheut në zgjedhje forcon, jo thjesht rolin e tyre në aspektin e fuqisë vendimmarrëse në vend, por forcon edhe shkallën, nivelin e detyrimit tonë për t’iu shërbyer dhe për t’u organizuar me ta”, tha Rama.

“Edhe këtu ka disa raste të veçuara suksesi apo pozitiviteti në raport me nevojën për këtë zhvillim por në tërësi jemi shumë mbrapa, rezultati lë shumë për të dëshiruar”.

“Ne jemi një vend i vogël dhe ne jemi një popull i vogël që nuk e kemi luksin që të mos kemi as dijeni për burimet tona njerëzore jashtë vendit. Nuk e kemi luksin që të mos kemi as dijeni për shqiptarët e shkolluar, për profesionistë e jashtëzakonshëm, që ne i kemi thuajse në të gjitha vendet e botës”, tha Rama.

Dhe minimalisht, shtoi kreu i qeverisë, “dijeninë për ta, për ekzistencën e tyre duhet të na e garantojë shërbimi diplomatik. E pastaj natyrisht me këtë dijeni shumëçka tjetër mund të parafytyrohet dhe mund të ndërtohet”.

“Por që ne të mos kemi një databazë që pasurohet dita-ditës me profesionistë shqiptarë në territoret e mbarë botës dhe kur shumë shqiptarë shkëlqejnë dhe bëjnë sukses dhe nuk kanë nevoja materiale ndaj Shqipërisë, por pa diskutim do ta mirëprisnin një interesim të Shqipërisë dhe patjetër në një masë të madhe do ta mirëprisnin një ftesë të Shqipërisë për të kontribuar, ndërkohë që bota është bërë kaq e ndërlidhur, kur nuk ka më asnjë nevojë për të lëvizur, që aty ku je që të japësh një kontribut, është e papranueshme që ne jemi kaq të paditur lidhur me një kapital të jashtëzakonshëm njerëzor që kemi jashtë vendit”, tha Rama.

“Ky duhet të jetë një objektiv ndër parësorët e të gjitha përfaqësive tona diplomatike”, theksoi Rama.

Po ashtu kryeministri shtoi se, “ngritja e Akademisë diplomatike sipas modeleve më të mira evropiane është një hap shumë i nevojshëm, i domosdoshëm i cili më në fund po hidhet ndërkohë që i domosdoshëm është dhe reformimi i të gjithë kuadrit normativ të shërbimit të jashtëm për të rritur profesionalizmin për të garantuar edukimin në vazhdim të të gjithë trupës dhe përmirësimin sistematik të burimeve njerëzore”.

“Së shpejti në Kuvend do të miratojmë të gjithë kuadrin e ri që do u mundësojë Ministrisë për Evropën dhe Punët e Jashtme të jetë më pranë dhe më efektive në përmbushjen e nevojave të përfaqësive tona, që patjetër do rrisë nga një anë kërkesën ndaj përfaqësive, por nga ana tjetër edhe mbështetjen për përfaqësitë tona diplomatike”, theksoi Rama.

“Jeta në Evropë dhe kudo është shtrenjtuar dhe nevoja për të pasur një trupë të motivuar është rritur. Natyrisht për ta përmbushur siç duhet këtë nevojë dhe për t’iu përgjigjur siç duhet sfidave dhe për ta shfrytëzuar potencialin që kemi duhet edhe një motivim më i madh financiar i trupës sonë të shërbimit të jashtëm”, tha Rama.

Burimi ATSH