Kryeministri Edi Rama kërkoi sot që diplomacia ekonomike të jetë aspekt prioritar i përfaqësive diplomatike.

Në fjalën e tij në konferencën 3-ditore të ambasadorëve shqiptarë nëpër botë, mbajtur në Tiranë, Rama u shpreh se, “një element kyç që për hir të së vërtetës mbetet hallka më e dobët e punës së shërbimit tonë diplomatik është diplomacia ekonomike, ku roli i përfaqësive tona është i dobët dhe ku përjashto raste shumë specifike dhe shumë të veçanta që lidhen me natyrën dhe vullnetin e ndonjë ambasadori kontributi është thuajse inekzistent”.

Rama u shpreh se, janë bërë disa herë përpjekje për të shtyrë në këtë drejtim, duke kujtuar organizimin e konferencës së dedikuar për aktivizimin e përfaqësive diplomatike në funksion të diplomacisë ekonomike, por rezultatet lënë shumë për të dëshiruar.

“Sa i përket politikës së jashtme qeveria këtu në Tiranë ua ka lehtësuar punën jashtëzakonisht dhe ndryshe nga si ndodhte më parë kur kancelaritë evropiane ishin të paarritshme nga Tirana dhe ishin krejtësisht të largëta për përfaqësitë tona, sot kancelaritë më të rëndësishme evropiane janë vetëm një telefon larg nga Tirana. Ndërkohë që puna e shërbimit diplomatik në vendet evropiane duhet të jetë e fokusuar tek rritja e intensitetit të lidhjeve me botën ekonomike, e cila nuk ka nevojë ta zgjasim, kur them se është tejet e zhvilluar në Evropë dhe ku duke shfrytëzuar impaktin e imazhit të ri ndërkombëtar të Shqipërisë mund të tërheqim shumë më tepër dhe mund të bëjmë shumë më tepër së bashku, por ama në këtë rast flas për nxitjen që duhet të vijë nga ju”, iu drejtua kryeministri Rama ambasadorëve.

Por, Rama u shpreh se nuk është vetëm Evropa.

“Ne kemi çuar në një nivel krejt tjetër marrëdhëniet me disa nga vendet kryesore të Gjirit dhe presim që edhe shërbimi diplomatik të ngrihet në atë nivel”, tha Rama.

Burimi ATSH