Policia e Shtetit ishte e pranishme në të gjithë vendin për të garantuar një fillim të qetë dhe të sigurt për rreth 345 mijë nxënës dhe 31 mijë mësues që nisën sot ditën e parë të vitit të ri shkollor.

Policia e Shtetit bën të ditur se, “të gjitha strukturat e Policisë, Patrullat e Përgjithshme, Policia Rrugore, strukturat e Policimit në Komunitet dhe Policia Kriminale, në bashkëpunim me oficerët e sigurisë në shkolla dhe stafet pedagogjike, zbatuan një plan të posaçëm masash, që synoi rritjen e sigurisë brenda dhe jashtë ambienteve shkollore”.

Policia Rrugore pati një prani të shtuar në akset rrugore, veçanërisht pranë shkollave që ndodhen pranë rrugëve kryesore, në fillim të nisjes së mësimit, që vijoi deri në përfundim të procesit mësimor.

Gjithashtu u zbatuan kontrolle të vazhdueshme për automjetet që transportuan nxënës, përfshirë testet e alkoolit për drejtuesit, kontrollin teknik të mjeteve dhe respektimin e normave të transportit të sigurt.

Policia e Shtetit theksoi se prania e saj do të vijojë çdo ditë pranë shkollave jo vetëm për të garantuar sigurinë fizike, por edhe për të ndërtuar një marrëdhënie të ngushtë me komunitetin shkollor, duke nxitur bashkëpunimin dhe ndërgjegjësimin qytetar.