Kryeministri Edi Rama njoftoi sot krijimin e Operatorit të Ujit, ndërsa u ndal te borxhet që kanë akumuluar ndërmarrjet e ujësjellës kanalizimeve për shkak të papërgjegjshmërisë në administrim.

Rama bëri të ditur se “borxhet e akumuluara nga këto ndërmarrje të administruara me papërgjegjshmëri ekstreme në vitin 2020 arritën në 13,6 miliardë lekë.

“Harxho, shpërdoro, dridh zinxhirin dhe ngarko kompaninë e shpërndarjes së energjisë me borxhe”, tha Rama.

Kryeministri kujtoi se në vitin 2021 qeveria ndërmori hapin e parë, duke hyrë në procesin e bashkimit të kompanive.

“Faktikisht, nga 58 shoqëri, ndërmarrje ujësjellës kanalizimesh, çeta, ne krijuam 15 shoqëri rajonale. Natyrisht, që qëllimi ishte të përmirësohej performanca dhe të rritej përgjegjshmëria në administrim”, shtoi Rama.

Sot, theksoi kryeministri, “kemi rezultate domethënëse që na tregojnë se përgjigjja ndaj kësaj sfide është bashkimi, jo copëzimi”.

“Njerëzit nuk pinë decentralizim në rubinet, pinë ujë, duan ujë. Dhe decentralizimi nuk është fragmentim dhe shkatërrim, por është përgjegjshmëri dhe shërbim. Sot kemi 9 shoqëri rajonale, nga 15, që nuk krijojnë më detyrime ndaj OSHEE-së. Është një hap i jashtëzakonshëm”, tha Rama.

Burimi ATSH