Investimet në infrastrukturën rrugore kanë shkurtuar ndjeshëm distancat mes qyteteve, si dhe kanë rritur sigurinë rrugore.

Kryeministri Edi Rama ndau sot pamje të disa prej këtyre investimeve, duke nisur nga tuneli i Llogorasë, Rruga e Arbrit, aksi Korçë-Ersekë, Unaza e Madhe e Tiranës, autostrada Thumanë-Kashar etj.

“Rrugët kombëtare të reja, një buqetë e infrastrukturës shqiptare që ka shkurtuar distancat”, shkruan Kryeministri, krahas pamjeve.

Në mesin e muajit mars të këtij viti përfunduan punimet për ndërtimin e Tunelit të Murrizit me gjatësi prej 3,78 kilometrash. Hapja e tunelit të Murrizit e bëri të aksesueshme edhe të gjithë Rrugën e Arbrit, një nga rrugët kombëtare më të rëndësishme. Me një gjatësi rreth 74 km, Rruga e Arbrit është një korridor lidhës i rëndësishëm Lindje-Perëndim.

Në maj 2025 u hap për qarkullimin e automjeteve tuneli i Llogorasë, një vepër e rëndësishme që shkurton distancën drejt bregdetit të jugut dhe që i shërben sezonit turistik.

Në qershor 2024 u hap për qarkullimin e mjeteve autostrada e re Thumanë-Kashar, pjesë e Korridorit Adriatiko-Jonian. Me një gjatësi prej 21 km dhe me shpejtësi qarkullimi 130 km/orë, kjo autostradë e kategorisë “A” ka lehtësuar ndjeshëm qarkullimin e mjeteve.

E konsideruar si projekti më i madh infrastrukturor në kryeqytet, Unaza e Madhe e Tiranës, me gjatësi 28,7 kilometrash, që lidh kryeqytetin me të gjitha rrugët dalëse kombëtare u hap për qarkullimin e mjeteve në 30 dhjetor 2024.

Ndërsa aksi kombëtar rrugor Korçë-Ersekë, me një gjatësi prej 45 kilometrash, shkurton me 35 kilometra distancën mes dy qyteteve.

/Burimi ATSH