Dead To Rights – Të Vdekur për të Drejtat, filmi mbi Masakrën e Nankinit, ka pushtuar kinematë e Kinës gjatë verës, duke tejkaluar 1.5 miliardë juanë (rreth 210 milionë dollarë) vetëm brenda 10 ditëve nga debutimi i tij më 25 korrik.

Me regji nga Shen Ao, filmi bëhet i pari pas Festivalit të Pranverës që arrin këtë moment historik në fitime dhe ruan dominimin e përditshëm të arkëtimeve në Kinë që nga debutimi i tij më 25 korrik, sipas ndjekësve të industrisë Maoyan dhe Beacon.

Filmi ka kryesuar listat e të ardhurave ditore në të gjitha rajonet në nivel province në tërë Kinën kontinentale për pesë ditë rradhazi deri të premten. Deri më tani, ai ka tërhequr mbi 30 milionë shikues, duke reflektuar jehonën e tij të fortë me audiencën.

Një kinema në qytetin Yancheng, provinca Jiangsu e Kinës lindore, shfaq postera promovues për filmat e gushtit, më 2 gusht 2025. /VCG

I mbështetur në prova fotografike të verifikuara të mizorive japoneze të kohës së luftës gjatë Masakrës së Nankinit, “Dead To Rights” (Të Vdekur për të Drejtat) tregon historinë e një grupi civilësh kinezë që kërkojnë strehim në një studio fotografike gjatë pushtimit brutal të Nankinit nga agresorët japonezë.

Në një përpjekje të dëshpëruar për mbijetesë, ata detyrohen të ndihmojnë një fotograf ushtarak japonez në riprodhimin e shiritave filmikë, por zbulojnë se negativat përmbajnë prova dënuese të mizorive të kryera nga forcat japoneze në gjithë qytetin. Të vendosur për të zbuluar të vërtetën, ata i fshehin negativat dhe rrezikojnë jetën e tyre për t’i kontrabanduar në botën e jashtme.

“Në atë epokë, fotografitë ruanin momentet më të çmuara të jetës. Një imazh i vetëm mund të mbante kujtimet e tërë familjes”, tha regjisori Shen Ao në një intervistë. Megjithatë, gjatë Masakrës së Nankinit, shtoi ai, forcat japoneze e përdorën fotografinë si armë për propagandë. “Në filmin tonë, studio përmban krimet që ata u përpoqën të fshihnin. E vërteta duhet ekspozuar.”

Një poster për filmin “Dead to Rights” është fotografuar në një kinema në Shangai më 20 korrik 2025. /VCG

Regjisori theksoi se pak njerëz e kuptojnë vërtet si mbijetuan këto regjistrime fotografike të mizorive japoneze të kohës së luftës, duke theksuar misionin e filmit për të përshkruar se si civilët kinezë rrezikuan jetën për të ruajtur provat dënuese.

“Të Vdekur për të Drejtat” aktualisht mban një vlerësim 8.6 nga 10 në Douban, një platformë kryesore për recensione filmash.

“Thjeshtësia dhe përmbajtja e rrëfimit e bëjnë çdo skenë jashtëzakonisht prekëse. Imazhet e pakta – të tilla si thika e mbajtur tek një foshnjë, kokat që rrotullohen, lumi i kuq i gjakut – janë më se të mjaftueshme për të përcjellë tmerrin,” theksohet në një koment popullor në Douban. Filmi shmang sensacionalizmin, duke lejuar që këto imazhe rrëqethëse të flasin vetë, vazhdon komenti.

Një përdorues i Maoyan kujtoi një moment prekës pas shfaqjes, teksa një vajzë e vogël pyeti nënën e saj nëse kishte ndonjë “skenë pas titrave”. Nëna u përgjigj butësisht: “Skena e vërtetë pas titrave fillon pasi dalim nga kinemaja.” Komenti vazhdonte, “Në fakt, rrugët e gjalla, turmat e zhurmshme, aroma e ushqimit në ajër – këto janë mrekullitë e vërteta.” Kjo ndjenjë kap mesazhin e thellë të filmit: një thirrje për të çmuar paqen dhe vitalitetin e Kinës moderne, e mundësuar nga sakrificat e së shkuarës.

Regjisori Shen Ao (majtas) dhe aktori Liu Haoran nga filmi “Dead to Rights” bisedojnë me audiencën gjatë një eventi promovues në Shangai më 28 korrik 2025. /VCG

Regjisori i njohur Feng Xiaoning e cilësoi filmin si një pikë të re kulmore për kinematografinë kineze. “Pasi mbaroi filmi, i gjithë publiku qëndroi pa lëvizur, derisa u transmetuan plotësisht titrat. Të gjithë ishin të zhytur në mendime të thella,” tha ai në një video që qarkulloi gjerësisht. “Unë besoj se çdo kinez dhe kushdo me ndërgjegje në botë, do të tronditet nga ky film.”

Sipas parashikimeve të fundit, “Dead To Rights” (Të Vdekur për të Drejtat) pritet të arrijë në total mbi 4 miliardë juanë të ardhura, një parashikim më i lartë krahasuar me pritshmëritë e mëparshme. Nëse arrihet ky sukses, ai do të bëhet filmi i dytë kinez me fitimet më të larta të vitit deri tani, duke lënë pas vetëm filmin e animuar “Ne Zha 2”.

Burimi CGTN