Kryeministri Edi Rama deklaroi sot se lirimi i hapësirave publike nga ndërtimet pa leje dhe strukturat abuzive është një çlirim i madh për komunitetin, këmbësorët dhe klientët e shërbimeve në zonat urbane.

“Çlirim i madh, jo vetëm për komunitetin e për këmbësorët, por edhe për ata që ulen nëpër tavolinat jashtë dhe marrin frymë lirisht, jo mbrapa xhamave, barrikadave e ferrave, çka rrit patjetër edhe cilësinë e shërbimit”, theksoi Rama, në një reagim në rrjetet sociale.

Ai paralajmëroi se procesi i lirimit të hapësirave publike do të vijojë, pavarësisht kundërshtimeve të përkohshme.

“Ka ende ngrehina që i rezistojnë më kot kërkesës për t’u shkulur vetë nga mexhelisi, se në fund të gjitha do ikin, por bashkë me një gjobë të kripur për ndërtuesin e pamirëkuptuar”, shtoi Kryeministri.

Burimi ATSH