Ministrja e Shtetit për Sipërmarrjen dhe Klimën e Biznesit, Delina Ibrahimaj, tha se “Shqipëria në një dekadë ka pësuar një transformim shumë të madh në sektorin e teknologjisë, inovacionit, startup-eve dhe ambicia është që Shqipëria të ketë brandin e vet në këtë sektor”.

E pranishme në takimin me përfaqësues të teknologjisë, inovacionit, startup-eve, që u zhvillua në Berat, me pjesëmarrjen e Kryeministrit Edi Rama, Ibrahimaj tha se, “sektori digjital tashmë është i konsoliduar dhe ka 3 400 subjekte të regjistruara, nga të cilat 1145 janë sha dhe dhe shpk, dhe pjesa tjetër profesionistë të lirë”.

“Ne jemi me vizionin që qeverisja jonë të jetë digjitale dhe për këtë, në bashkëpunim edhe me aktorët e linjës kemi krijuar një treg i ka të gjitha bazat për të qenë i qendrushëm”, tha Ibrahimaj.

Ajo tha se sa i takon shërbimeve digjitale, Shqipëria renditet sot në vendin e 8-të në Europë dhe në vendin e 19-të në botë për ofrimin e shërbimeve digjitale. Ndërkohë, në këto 10 vite ky sektor ka rritur punësimin në 20 mijë, shifër kjo e rritur me 20 herë në vit.

Gjithashtu vijoi ajo, rritje kanë shënuar edhe eksportet nga ky sektor.

“Eksportet nga ICT shënojnë 210 milionë dhe përbëjnë 2,7 të eksporteve totale ose 1% të PBB. Këto janë shifra që na bëjnë krenarë ndërsa synojmë të çojmë përpara ambicien për zhvillimin dhe ndërkombëtarizimin e sektorit. Qeveria nuk është më rregullator i këtij sektori por është një bashkëkrijues dhe mbështetës i sektorit”, u shpreh Ibrahimaj.

Teksa u ndal në rëndësinë e produkteve digjitale që prodhohen sot në vend, që siç tha Ibrahimaj “janë histori suksesi”, ajo inkurajoi pjesëmarrësit aktorë të fushës të çojnë më tej idetë dhe projektet novatore për t’i ndërkombëtarizuar, rritur eksportet dhe deri në krijimin e një brandi shqiptar në këtë fushë.

Burimi ATSH