Drejtuesja e Agjencisë Kombëtare të Shoqërisë së Informacionit (AKSHI), Linda Karçanaj, mori pjesë në sesionin informues mbi Programin për Evropën Dixhitale (Digital Europe Programme).

Karçanaj e cilësoi këtë aktivitet, si një iniciativë ambicioze që reflekton vizionin e përbashkët për një të ardhme më të ndërlidhur, më gjithëpërfshirëse dhe më të aftë për çdo qytetar evropian.

Si drejtuese e AKSHI-t, Karçanaj pohoi se çdo ditë teknologjia mund të ndryshojë jetën e qytetarëve, nga përmirësimi i shërbimeve publike deri te ndërtimi i një administrate moderne, transparente dhe efikase.

“Me programin Digital Europe kemi mundësinë që të mos jemi thjesht përfitues, por partnerë aktivë dhe kontribuues në këtë transformim të përbashkët evropian. Ndihem veçanërisht e angazhuar edhe në rolin tim si bashkënegociatore për Kapitullin 10, “Transformimi Dixhital dhe Media”, i cili është hapur së fundmi në kuadër të negociatave për anëtarësim në BE, një dëshmi e qartë e vendosmërisë sonë për të përqafuar standardet më të larta evropiane në fushën e teknologjisë dhe inovacionit”, tha Karçanaj.

Sipas drejtueses së AKSHI-t, “ky sesion shënon një pikënisje konkrete për të shfrytëzuar sa më mirë thirrjet e programit Digital Europe 2025–2027, për të forcuar institucionet shqiptare, për të ndërtuar kapacitete të reja dhe për të thelluar bashkëpunimin me partnerët evropianë. Transformimi dixhital nuk është më e ardhmja, është realiteti ynë”, përfundoi ajo.

Burimi ATSH