Mbi një vit pas sekuestrimit të 2 800 tonëve mbetje të rrezikshme të kthyer nga Tajlanda, të cilat ende mbahen në kontejnerë në Porto Romano, Ministria e Mjedisit ka sqaruar se po ndiqet çdo mundësi ligjore për trajtimin e tyre.

Në një konferencë për shtyp me gazetarët, ministri i Mjedisit, Sofjan Jaupaj, u shpreh se institucioni që ai drejton është në dispozicion të plotë të Agjencisë së Pasurive të Sekuestruara dhe Konfiskuara për të mbështetur procesin që lidhet me asgjësimin e këtyre mbetjeve.

“Ne vlerësimin tonë, si dhe të ekspertëve të mjedisit, ekzistojnë dy rrugë kryesore që mund të ndiqen megjithatë duhet të shikojmë edhe vendimarrjen e agjencisë dhe të instancave ligjzbatuese. Së pari, nëse do të vlerësohet që mbetjet mund të eksportohen për t’u asgjësuar nga subjekte të huaja. Së dyti, nëse vlerësohet e nevojshme, mbetjet mund të asgjësohen në territorin e Shqipërisë. Ministria e Mjedisit është e gatshme të ofrojë mbështetjen e saj, me të gjithë subjektet e saj private të licencuara për asgjësimin e këtyre tip mbetjesh”, tha Jaupaj.

Ai nënvizoi gjithashtu se për shkak të sensitivitetit të çështjes, procesi do të jetë i plotë transparent dhe në bashkëpunim me të gjitha agjencitë përkatëse, duke respektuar ligjin dhe standardet ndërkombëtare të mjedisit.

Ministri Jaupaj siguroi se çdo vendim përfundimtar do të merret me kujdes, duke garantuar sigurinë mjedisore dhe kontrollin ligjor të plotë të mbetjeve, ndërkohë që institucioni që ai drejton mbetet i angazhuar për të ndjekur të gjitha hapat e nevojshëm për zgjidhjen e çështjes.

Burimi ATSH