Kryeministri Edi Rama tha sot se plani që do të zbatohet nga ky vit për hapësirat në plazhet publike është tejet ambicioz dhe ka një ndryshim radikal nga vjet.

Në rubrikën “Sy m’sy”, duke iu përgjigjur pyetjes së një komentuesi në rrjetet sociale për hapësirat publike në plazhe, Rama tha se “çdo vit kemi ardhur duke vënë më shumë disiplinë duke krijuar më shumë hapësirë për të gjithë në sensin që plazhet nuk mund të jenë ekskluzivitet i atyre që kanë mundësi apo duan që të shkëmbehen në hapësirat e administruara privatisht”.

“Mbi të gjitha plazhet mund të ofrojnë mundësi për ata që duan të jenë tërësisht të lirë dhe tërësisht të pacënuar të drejtën për të marrë kënaqësinë e tyre në një aset publik duke shfrytëzuar hapësirën tërësisht publike dhe faktikisht plani që do të zbatohet nga ky vit është tejet ambicioz dhe ka një ndryshim radikal nga vjet”, nënvizoi Rama.

Kreu i qeverisë u shpreh se “ne jemi duke e ndjekur sapo ka filluar, nuk jemi akoma në momentet e pikut të sezonit kështu që rri i qetë do të kesh në të gjithë territorin të gjithë vijën bregdetare hapësira për të bërë plazh pa pasur nevojë ti kërkosh akujt asgjë nëse do të qëndrosh thjesht edhe vetëm me veten, dhe me kë të do zemra, me diellin mbi kokë dhe detin përballë”.

Burimi ATSH