Në kuadër të festimeve për Ditën Ndërkombëtare të Fëmijëve, ministrja e Shëndetësisë dhe Mbrojtjes Sociale Albana Koçiu festoi së bashku me fëmijët përfitues të programeve sociale të qeverisë.

Ministrja së bashku me fëmijët ishin të pranishëm në një fermë ku zhvilluan aktivitete të ndryshme si gatimi i ëmbëlsirave, njohja më kafshët, vjelja e perimeve, vizatime si dhe u shpërndanë edhe dhurata.

Ministrja ndau në rrjetet sociale momente nga aktiviteti me fëmijët ku shkruan se “1 Qershorin e festuam mes natyrës, kafshëve dhe shumë buzëqeshjeve, së bashku me fëmijët përfitues të programeve tona sociale”.

“Një ditë ndryshe, plot lojë, argëtim dhe dashuri, sepse çdo fëmijë meriton të ndihet i veçantë dhe i lumtur”, shkruan më tej ministrja.

Dita Ndërkombëtare e Fëmijëve u shpall më 1925-ën nga Konferenca Botërore e Mirëqenies së Fëmijëve, në Zvicër.

Kjo ditë synon t’u kujtojë të rriturve të mbrojnë fëmijët nga çdo lloj abuzimi dhe t’u krijojë atyre mundësitë për të ngritur të ardhme të paqtë.

Dita Ndërkombëtare e Fëmijëve kremtohet në fillim të qershorit, kryesisht në vendet e ish- bllokut komunist, ndërsa shumë vende të tjera të botës e kremtojnë në 20 nëntor, që përkon me Deklaratën e të Drejtave të Fëmijëve nga Asambleja e Kombeve të Bashkuara.

Në disa shtete nuk ka një ditë feste, por plot një javë festime, duke e quajtur Java e Fëmijëve.

Burimi ATSH