Agroturizmet janë kthyer tashmë në modele të zhvillimit për ekonomitë lokale.

Ministrja e Bujqësisë dhe Zhvillimit Rural, Anila Denaj ndau në rrjete sociale pamje nga Vila Leonard në Dobresh, të Tiranës, si një ndër investimet në sektorin e agroturizmit që kontribuon në zhvillimin e zonave rurale.

“Ky biznes është një shembull i zhvillimit lokal ku çdo produkt “Made in Albania” që shërbehet në tryezat e saj vjen nga fermerët dhe blegtorët e zonës, duke forcuar ekonominë vendase dhe gjeneruar punësim për komunitetin”, u shpreh Denaj.

E ndërtuar në një zonë piktoreske të Dobresh, Vila Leonard ofron për vizitorët dhe turistët një eksperiencë unike mikpritjeje, natyre dhe qetësie.

Denaj tha se, “me një ambient të ngrohtë, të rrethuar nga gjelbërimi dhe ajri i pastër, është destinacioni ku shija dhe tradita ndërlidhen me njëra-tjetrën”.

Ndërsa përfaqësuesi i këtij biznesi tregoi se, ambientet e kësaj pike agroturistike, krahas restorantit, pishinës ofrojnë akomodim edhe për fjetje.

“Ne kemi 9 dhoma standarde dhe dy suita. Bashkëpunojmë me fermerët e zonave përreth për furnizimet me produkte bujqësore të stinës dhe shohim një shtim të turistëve të huaj në pikën tonë”, tha ai.

Burimi ATSH