Presidentja e Kosovës, Vjosa Osmani, është kërcënuar me jetë gjatë kësaj jave, tha këshilltari i saj për media, Bekim Kupina.

Në një njoftim për media, ai tha se “kërcënimi i kësaj jave është vazhdimësi e kërcënimeve të vazhdueshme me jetë ndaj presidentes Osmani”.

Kupina i kritikoi autoritetet e drejtësisë për “mosveprimin” e tyre në këto raste.

“Përkundër dhjetëra kërcënimeve — shumica prej tyre kërcënime me jetë — asnjë veprim nuk është ndërmarrë ndaj kërcënuesve për vite me radhë”, tha ai.

Kupina tha se “në shumicën e rasteve”, kërcënimet bëhen me “emër, mbiemër dhe nga profile të identifikueshme”, por nuk dha më shumë hollësi rreth kërcënimeve apo kërcënuesve.

“Disa kërcënime janë bërë madje edhe në emisione televizive, por edhe atëherë kanë munguar veprimet për t’i përballur kërcënuesit me përgjegjësi”, nënvizoi ai.

Sipas tij, rasti i kërcënimeve “të njëpasnjëshme me jetë ndaj presidentes dhe familjes së saj është i vetmi në historikun e institucioneve, siç na është thënë nga institucionet e sigurisë, ku asnjë nga kërcënuesit nuk është përballur me drejtësinë”.

“Kjo klimë e rrezikshme nxit të tjerë të ndjekin të njëjtin model: nxitje dhune, thirrje për eliminim fizik dhe përçmim të plotë ndaj rendit kushtetues”, shtoi ai. /rel/