Nga sheshi “Skënderbej” kryeministri Edi Rama, njëherësh kryetar i Partisë Socialiste mbajti sot një fjalim falënderues për qytetarët shqiptarë pas fitores së zgjedhjeve parlamentare të 11 majit.

Në fjalën e tij, kryeministri Rama theksoi se kjo është një fitore historike dhe mbi të gjitha për momentin historik kur kjo fitore mori jetë për Shqipërinë, duke ju referuar rrugëtimit të vendit në integrimin në Bashkimin Europian.

“Në kujtesën time kjo fjalë fitoreje ka qenë më e vështira gjer më sot për t’u bërë një fjalë që arrin ta thotë atë çfarë për mua është kjo fitore dhe ndjesë sepse realisht më është e pamundur të arrij ta them me gojë gjithçka që ndjej dhe mendoj prej orësh të gjata ditësh e netësh pa gjumë përballë një arritje të tillë, e cila është historike jo thjeshtë për përmasën e fitores së PS, por mbi të gjitha për momentin historik kur kjo fitore mori jetë për Shqipërinë”, tha Rama.

Rama falënderoi anëtarët e Partisë Socialiste për punën e bërë për fitoren e zgjedhjeve.

“Nuk ka fjalë të mjaftueshme për t’i falënderuar dhjetëra e dhjetëra, mijëra gra dhe burra vajza dhe djem të familjes sonë të madhe politike që 4 vite me radhe e shtruan me përpjekje durim dhe disiplinë në çdo territor të Shqipërisë dhe së fundmi për 9 muaj pa pushim edhe në çdo drejtim jashtë kufijve ku jetojnë shqiptarët rrugën e kësaj fitoreje të paharrueshme.

“Faleminderit aq herë faleminderit sa ç’janë anëtarë dhe anëtare të familjes sonë politike që e bënë si duhet pjesën e tyre për këtë fitore, aq herë faleminderit sa çdo mbështetës i PS-së, që dha votën e vet për këtë fitore dhe sa çdo zgjedhës që këtë herë erdhi me votën e tij drejt njësh edhe pse mund të mos jetë tradicionalisht me ne”, tha Rama.

Një falënderim kreu i qeverisë e kishte edhe për votuesit jashtë vendit.

“Një falënderim krejt të veçantë do ta bëj për shqiptarët e Greqisë, Italisë, Evropës, Amerikës dhe kudo tjetër ku qoftë edhe një shqiptar i vetëm u regjistruan si zgjedhës. Ka qenë një ushtrim i parë historik për nga fakti I herës së parë dhe fantastik për nga numri i pjesëmarrësve të regjistruar një nga më të larti i diasporës që kemi parë në Evropë. Shume faleminderit nga zemra një përqafim të gjithëve nga sheshi i Gjergj Kastriotit”, u shpreh Rama.

Burimi ATSH