Ministri i Mjedisit, Sofjan Jaupaj zhvilloi sot takim me operatorët e rafting që kryejnë aktivitetin në lumin e Vjosës.

Gjatë takimit u diskutuan nevojat dhe sfidat e tyre, me fokus zgjatjen e sezonit të rafting dhe shtimin e vendqëndrimeve përgjatë gjithë gjatësisë së lumit.

Të gjitha palët në takim, bashkia Përmet, Parku Kombëtar i Vjosës, Federata Shqiptare e Raftingut dhe operatorët turistikë përmetarë pas uljes në tryezën e bisedimeve ranë dakord që sezoni i ri i lundrimit me mjete të lehta jomotorike në lumin Vjosa të jetë në afatin kohor 1 prill deri më 30 nëntor 2026.

Urdhri i vjetër i cili parashikonte datat 1 maj-15 tetor do të shfuqizohet.

Jaupaj informoi se pati dakordësi që operatorët do të lidhin marrëveshje me Zyrën e Vjosës për tarifat mujore, duke krijuar një kuadër më të qartë dhe të organizuar për ushtrimin e rafting.

“Në kushtet kur sezoni turistik po nis gjithnjë e më herët, zonat e mbrojtura, e veçanërisht Vjosa, janë kthyer në një pasaportë të turizmit të qëndrueshëm të Shqipërisë në botë. Për këtë arsye Ministria e Mjedisit mbetet e angazhuar të trajtojë çdo problematikë të komuniteteve dhe sipërmarrjeve ekoturistike, për të gjetur ekuilibrin mes mbrojtjes se biodiversitetit dhe ekoturizmit”, tha Jaupaj.

Në këtë tryezë të përbashkët me kryetaren e bashkisë Përmet Alma Hoxha, Agjencinë e Zonave të Mbrojtura dhe Zyrën e Administrimit të Parkut Kombëtar të Lumit Vjosa, u ndanë ide dhe hapa konkretë për zhvillimin e mëtejshëm të këtij aktiviteti.

Lumi Vjosa, i njohur si “lumi i fundit i egër në Evropë”, po kthehet në një destinacion gjithnjë e më të preferuar për adhuruesit e natyrës dhe sporteve ekstreme. Të apasionuar pas sporteve ekstreme, turistë të shumtë rendin në rrjedhën e Vjosës për të përjetuar eksperiencën unike të rafting.

Turistët e aventurës përshkojnë lumin nga Përmeti deri në Këlcyrë me një gjatësi gati 20 km.

Burimi ATSH