Nga aeroporti Ndërkombëtar i Vlorës (VIA) ku edhe u krye sot fluturimi i parë certifikues, Kryeministri Edi Rama bëri të ditur se kompania ajrore “Air Kosova” së shpejti do të nisë fluturime në aeroportin e Kukësit.

Rama tha se “Air Kosova” do të jetë kompania tjetër shqiptare e cila do ta ketë bazën e saj në Kukës, siç do të ketë “Air Albania” bazën e saj në Vlorë. Rama tha se kompania po fillon punën për të siguruar avionët.

“Ka nisur puna prej kohësh dhe në janar është regjistruar zyrtarisht kompania, një kompani e re shqiptare, tani ju të Kosovës do prekeni në mënyrë të posaçme. Një kompani e re shqiptare e cila do të nisë së shpejti për të mos i ndalur më fluturimet në aeroportin e Kukësit. “Air Kosova” do të jetë kompania tjetër shqiptare dhe këta dy avionë do të jetë dy avionët e krenarisë sonë të përbashkët Air Albania që do të ketë bazën e vet këtu në Vlorë dhe Kosova që do të ketë bazën e vet në Kukës dhe për ta konfirmuar këtë kam sjellë me vete edhe certifikatën, ky është regjistrimi i kompanisë qysh në janar të 2025″, u shpreh Rama.

“Kompania po fillon për të siguruar avionët dhe për të filluar operacionet në territor. Nuk po jap datë sepse kam mësuar tanimë që këto datat që jap unë fusin brenda syrin e keq”, tha Rama.

Burimi ATSH