Ministri i Ekonomisë, Kulturës dhe Inovacionit, Blendi Gonxhja, bëri të ditur se nga 5 maji deri më 31 tetor 2025, të gjitha muzeumet, parqet arkeologjike, kalatë dhe sitet e tjera të trashëgimisë kulturore në të gjithë vendin do të jenë të hapura për vizitorët çdo ditë të javës, nga ora 09:00 deri në 19:00.

“Synimi ynë është që të ofrojmë një përvojë sa më të pasur kulturore për vizitorët vendas dhe të huaj, duke i bërë asetet tona kulturore më të aksesueshme gjatë sezonit turistik,” deklaroi ministri Gonxhja.

Për disa site me specifikë të veçantë, janë përcaktuar orare të diferencuara.

Në Durrës, Kulla Veneciane, Amfiteatri dhe Hamami Mesjetar do të qëndrojnë të hapura nga ora 09:00 – 14:00 dhe 17:00 – 21:00.
Muzeu Kombëtar i Pavarësisë, Vlorë do të qëndrojë i hapur nga data 5 maj – 30 qershor dhe 11 shtator – 31 tetor nga ora 09:00 – 19:00. Për periudhën 1 korrik – 10 shtator do të qëndrojë i hapur nga ora 09:00 – 12:00 dhe 17:00 – 22:00

Parku Kombëtar i Butrintit do të qëndrojë hapur nga ora 08:30 – 20:00.

Ky sezon pritet të sjellë më shumë vizitorë, duke nxitur zhvillimin e turizmit kulturor dhe promovimin e trashëgimisë kombëtare.

“Ejani të përjetoni nga afër kulturën dhe historinë e vendit tonë në një sezon plot gjallëri dhe emocione”, theksoi ministri Gonxhja.