Ambasadorët austriakë të rajonit të Ballkanit Perëndimor u takuan sot me përfaqësues të Strukturës së Posaçme për Luftën Kundër Korrupsionit dhe Krimit të Organizuar (SPAK).

Ata mblodhën këtë javë në Tiranë, në kuadër të konferencës vjetore të ambasadorëve austriakë të rajonit të Ballkanit Perëndimor, e cila këtë vit u mbajt në Tiranë.

Zyra e shtypit e ambasadës, në një postim në rrjetet sociale bëri të ditur se Austria është qartazi e përkushtuar ndaj perspektivës së Shqipërisë në BE dhe po mbështet, ndër të tjera, zbatimin e reformës në drejtësi.

“Pak muaj më parë u hap rruga për negociatat gjithëpërfshirëse të anëtarësimit të Shqipërisë në BE. Austria është qartazi e përkushtuar ndaj perspektivës së Shqipërisë në BE dhe po mbështet, ndër të tjera, zbatimin e reformës në drejtësi. Kështu, ambasadoret dhe ambasadorët austriakë të rajonit të Ballkanit Perëndimor shkëmbyen ide edhe me përfaqësues të Strukturës së Posaçme për Luftën Kundër Korrupsionit dhe Krimit të Organizuar (SPAK), gjatë konferencës së tyre në Tiranë”, citohet postimi.

Pavarësia e SPAK-ut në hetimin, ndjekjen dhe gjykimin e rasteve të korrupsionit të nivelit të lartë dhe krimit të organizuar, sipas ambasadës, është thelbësore për forcimin e shtetit të së drejtës në Shqipëri.

Burimi ATSH