Komisionerja e Bashkimit Europian për Zgjerimin, Marta Kos, në kuadër të vizitës së saj në Tiranë, zhvilloi sot një takim me drejtues të institucioneve të pavarura të drejtësisë.

Në takim me komisioneren Kos ishin kreu i SPAK, Altin Dumani, Prokurori i Përgjithshëm Olsian Çela, Inspektori i Lartë i Drejtësisë, Artur Metani, si dhe kryetari i Këshillit të Lartë të Drejtësisë Ilir Rusi.

Në një postim në rrjetet sociale, Kos vlerësoi takimin me drejtuesit e institucioneve të pavarura të drejtësisë, të cilat sipas saj, “mundësojnë një Shqipëri dhe Evropë të qetë dhe të sigurt”.

“Përgëzova angazhimin e tyre për të luftuar korrupsionin dhe krimin e organizuar dhe shpreha mbështetjen e vendosur të BE-së për rolin e tyre dhe metodat e punës, veçanërisht për SPAK-un”, u shpreh ajo.

Komisionerja Kos nënvizoi se “është e rëndësishme të angazhohemi në ndërtimin e një sistemi gjyqësor të pavarur dhe funksional, por edhe të rrënjosim më shumë respektin për shtetin e së drejtës”.

Marrë nga ATSH