Nga Panairi i Parë i Punës që po zhvillohet sot në Athinë, kryeministri Edi Rama njoftoi se do të zhvillohen dy panaire në vit, ndërsa shumë shpejt do të organizohet edhe një panair i punës në Itali.

Gjatë takimeve me sipërmarrësit në çdo stendë të këtij panairi, ku po prezantohen ofertat e punës dhe pagat sipas sektorëve të ndryshëm, kreu i qeverisë propozoi që të zhvillohen dy panaire në vit, ndërsa tha se shumë shpejt do të bëhet edhe panairi i punës në Itali.

Kryeministri Rama pohoi se do të ketë të tjerë panair në të ardhmen.

“Ideja është të kemi një panair të pranverës, një panair të vjeshtës në Greqi dhe pastaj do e bëjmë dhe në Itali. Po tani që ne kemi bindjen që me pagat jemi më mirë sesa këtu. Besoj që një vit e gjysëm, dy do të jemi pak a shumë si Italia”, nënvizoi Kryeministri gjatë bisedave me përfaqësues të kompanive të ndryshme shqiptare.

Panairi i Punës, i cili do të qëndrojë i çelur përgjatë gjithë ditës, deri në orët e para të mbrëmjes është i organizuar në panele, dedikuar fushave të ndryshme, konktretisht: Ndërtimi dhe Transporti; Mësuesit për Shqipërinë; Ekonomia, Punësimi & Familja; Hoteleria & Turizmi; Bujqësia dhe Zhvillimi Rural; Bashkitë, Investime & Punësim. Sipas fushave, panelet do të drejtohen nga ministrat përkatës, Belinda Balluku, Ogerta Manastirliu, Blendi Gonxhja, Mirela Kumbaro, Anila Denaj dhe Arbjan Mazniku.

Burimi ATSH