Drejtorja e Agjencisë Kombëtare të Shoqërisë së Informacionit (AKSHI), Linda Karçanaj po merr pjesë në takimin e Grupit të Punës mbi Sigurinë në funksion të Teknologjisë së Informacionit dhe Komunikimit (OEWG) që po mbahet në Nju-Jork.

Karçanaj ndau në rrjetet sociale momente nga dita e dytë e punës të Grupit, teksa bëri të ditur se “Shqipëria është pjesëmarrëse aktive në nismat globale për sigurinë kibernetike”.

Në fjalën e mbajtur në këtë takim, Karçanaj, informoi kolegët e Kombeve të Bashkuara se Shqipëria ka miratuar një Ligj të ri për Sigurinë Kibernetike, në përputhje me standardet e BE-së dhe të OKB-së.

Ajo u ndal në hapat që ka hedhur qeveria për thellimin e bashkëpunimit me institucionet ndërkombëtare për forcimin e sigurisë.

“Kemi thelluar bashkëpunimin me NATO-n, BE-në dhe OKB-në për forcimin e sigurisë kibernetike dhe për të parandaluar dhe reaguar ndaj sulmeve të sponsorizuara shtetërore; Kemi krijuar një Komision të Posaçëm Parlamentar për të luftuar dezinformimin dhe ndërhyrjet e huaja. Përgjegjshmëria, transparenca dhe bashkëpunimi ndërkombëtar janë thelbësore për një mjedis të sigurt dhe të besueshëm digjital”, tha ajo.

“Shqipëria është e angazhuar të kontribuojë në një të ardhme më të sigurt dhe më të qëndrueshme për të gjithë, duke promovuar paqen dhe sigurinë globale”, u shpreh Karçanaj.

Burimi ATSH