Ministri i Brendshëm Ervin Hoxha është takuar sot me ambasadorin e Bashkimit Evropian në Tiranë, Silvio Gonzato.

Gjatë takimit, siç bëri të ditur Hoxha nëpërmjet një postimi në rrjetet sociale, është diskutuar “mbi masat e marra për të garantuar një proces zgjedhor të qetë e të sigurt”.

“Theksova angazhimin e Gjendjes Civile dhe Policisë së Shtetit për përmbushjen e detyrimeve, sipas Kodit Zgjedhor”, nënvizon Hoxha.

Hoxha thekson më tej se “gjithashtu, folëm mbi progresin e Shqipërisë në kuadër të Kapitullit 24, “Drejtësia, Liria dhe Siguria”, si dhe rezultatet e arritura në luftën kundër krimit të organizuar, migracionit të paligjshëm dhe kundër paligjshmërisë në tërësi”.

“Shqipëria po ecën me vendosmëri drejt anëtarësimit në BE”, e përmbyll reagimin Hoxha.