Këshilli i Ministrave miratoi sot një vendim të rëndësishëm lidhur me përcaktimin e rregullave dhe kritereve për dhënien e shpërblimit për punonjësit e Policisë së Shtetit.

Në një prononcim për mediet, pas mbledhjes së qeverisë, ministri i Brendshëm, Ervin Hoxha tha se “sikurse jeni në dijeni në gusht të 2024 ligji i ri i Policisë së Shtetit miratoi gjithë veprimtarinë, organizimin, planifikimin dhe shpërblimin e Policisë së Shtetit”.

“Në këtë mënyrë jemi në një risi dhe në një dhënie të vazhdueshme të ndihmës për Policinë e Shtetit. Shumë shpejt aktiviteti i organizimit dhe dhënies së këtyre shpërblimeve do të unifikohet”, tha Hoxha.

Ministri Hoxha u shpreh se “qeveria është dhe përcakton shumë shprehimisht vullnetin e saj për misionin e rëndësishëm që ka Policia e Shtetit në politikën e saj të vazhdueshme, roli i policisë është një rol shumë kyç dhe motivimi i forcave të policisë do të jetë në prioritetin e objektivave të qeverisë shqiptare”.

Burimi ATSH