Kryeministri Edi Rama zhvilloi një konsultim me një përfaqësi prindërish që drejtojnë Këshillat e Prindërve dhe anëtarë të këshillave në shkolla të ndryshme të Tiranës, ku u rrahën mendime mbi problematika të ndryshme të nxënësve në shkolla.

Një rast i shtruar për diskutim nga një mësuese ishte dhe ai i nxënësve problematikë në sjellje, të cilët nuk ndryshojnë dhe kthehen edhe në rrezik, me gjithë përpjekjet e mësuesve, prindërve apo oficerit të sigurisë.

Pyetjes nëse duhet të konsiderohen shkollat e riedukimit, Kryeministri zgjodhi t’i përgjigjej me një opinion personal, ndërsa u shpreh se për këtë duhet të flasin ekspertët.

“Çdo shkëputje e këtyre lloj fëmijëve, që kanë arsyet e tyre për të qenë ashtu, t’i shkëpusësh e t’i bashkosh bashkë si drurë të shtrembër në një turrë diku, duke i stigmatizuar si ‘dele të zeza’, nuk sjell as çlirimin e shkollave që i kanë plotësisht”, tha Rama.

Kjo, sipas tij, as nuk i bën ata më të mirë.

“Përkundrazi, kam frikë se më shumë i traumatizon dhe i fut në një labrinth që rrit kapacitetin kriminal. Kështu them unë, por nuk këmbëngul që mund të jetë kështu, se ka studime për këtë”, u shpreh Rama.