Të ardhurat nga mallrat e akcizës kanë shënuar rritje gjatë gjashtëmujorit të parë të vitit 2026, me një kontribut të rëndësishëm nga karburantet, cigaret dhe produktet e tjera të akcizës.

Sipas të dhënave fiskale nga Dogana, të ardhurat nga karburantet u rritën me 1,63 miliardë lekë, ndërsa akciza nga cigaret shënoi rritje me 1,52 miliardë lekë krahasuar me të njëjtën periudhë të vitit të kaluar.

Gjithashtu, rritje janë regjistruar edhe në kategoritë e tjera. Të ardhurat nga pijet alkoolike u rritën me 63,4 milionë lekë, nga vera me 41,3 milionë lekë, ndërsa nga kafeja me 22,8 milionë lekë.

Performanca pozitive e këtyre zërave lidhet me rritjen e konsumit dhe zgjerimin e importeve në kategoritë kryesore të mallrave të akcizës.

Të ardhurat nga akcizat përbëjnë një komponent të rëndësishëm të të ardhurave buxhetore, ndërsa administrata fiskale vijon monitorimin e tregut dhe masat për rritjen e formalizimit të aktivitetit ekonomik.