Sistemi i drejtësisë në Shqipëri po kalon drejt një transformimi digjital përmes projektit “BE për Drejtësinë Digjitale” (EU4Digital Justice), i financuar nga Bashkimi Evropian me një buxhet prej 7,5 milionë eurosh.

Zyra e BE-së në Tiranë bën të ditur se, projekti synon krijimin e një hapësire të unifikuar digjitale për shkëmbimin e informacionit ndërmjet institucioneve të drejtësisë, si dhe ndërtimin e një sistemi modern për menaxhimin e çështjeve gjyqësore.

Në kuadër të kësaj nisme po përmirësohet infrastruktura teknologjike përmes rrjeteve të reja, serverëve dhe sistemeve të sigurta për ruajtjen e të dhënave, duke synuar rritjen e efikasitetit, transparencës dhe llogaridhënies në sistemin gjyqësor.

Sistemi i ri i menaxhimit të çështjeve do të mundësojë digjitalizimin e ciklit të plotë të çështjeve penale, nga policia te prokuroria dhe më pas te gjykatat, duke reduktuar përdorimin e dosjeve fizike dhe vonesat administrative.

Përfaqësuesi i UNOPS, partnerit zbatues të projektit, Artem Danchenko, u shpreh se kjo nismë përbën një etapë të rëndësishme në progresin e Shqipërisë për forcimin e shtetit të së drejtës dhe përputhjen me standardet evropiane.

Sistemi do të përfshijë gjithashtu mekanizma të avancuar sigurie, përfshirë gjurmimin e çdo veprimi në platformë, për të garantuar mbrojtjen e të dhënave sensitive dhe rritjen e besimit në proceset e drejtësisë.

“Projekti, i zbatuar nga UNOPS për një periudhë 48-mujore, parashikon edhe forcimin e kapaciteteve të strukturave të teknologjisë së informacionit në sistemin e drejtësisë dhe përdorimin e mjeteve të inteligjencës së biznesit për vendimmarrje të bazuar në të dhëna”, thuhet në njoftimin e publikuar nga Zyra e BE-së në Tiranë.

Marrë nga ATSH