Ministrja e Shëndetësisë dhe Mbrojtjes Sociale, Albana Koçiu iu drejtua sot me një fjalë Sesionit të 68-të të Komisionit për Statusin e Gruas në OKB.

Në fjalën e mbajtur në këtë sesion, Koçiu nënvizoi të gjitha nismat dhe angazhimet konkrete të ndërmarra nga qeveria shqiptare dhe MSHMS për fuqizimin e grave në të gjitha sferat e jetës publike, sociale dhe ekonomike bazuar edhe në Strategjinë Kombëtare për Zhvillim dhe Integrim dhe Strategjinë Kombëtare për Barazinë Gjinore.

“Prioriteti ynë është që t’i jepet fund dhunës me bazë gjinore”, tha ministrja.

Po ashtu, Koçiu renditi si prioritete edhe mbylljen e hendeqeve gjinore në tregun e punës, rritjen e pjesëmarrjes së barabartë në sektorë të ndryshëm të ekonomisë, adresimin e pagës gjinore, mbylljen e hendekut të kujdesit gjinor dhe rritjen e përfshirjes së grave në vendimmarrje dhe në politikë.