Ministri i Bujqësisë dhe Zhvillimit Rural, Andis Salla, ka ndarë në rrjete sociale historinë e fermerit Krenar Lashi nga Kukësi, i cili ka diversifikuar aktivitetin e fermës së tij duke kombinuar pemëtarinë me blegtorinë.

Salla theksoi se Krenari është një nga fermerët që po investojnë dhe po rrisin prodhimin falë mbështetjes së politikave bujqësore dhe Skemës Kombëtare të Mbështetjes.

Në 20 dynymë tokë, fermeri kultivon 5 dynymë me qershi, 5 dynymë me mollë, 5 dynymë me rrush dhe 5 dynymë me kumbulla, duke siguruar një prodhim të larmishëm frutor.

Prej vitit 2025, ai ka zgjeruar aktivitetin edhe në sektorin e blegtorisë, ku mbarështon 25 krerë lopë dhe 20 viça. Qumështi i prodhuar në fermë dërgohet për përpunim në baxhot e zonës.

Krenar Lashi është përfitues i Skemës Kombëtare të Mbështetjes dhe ka aplikuar sërish këtë vit për subvencione pranë Agjencisë për Zhvillim Bujqësor dhe Rural (AZHBR).

“Kam aplikuar në skemën e mbështetjes së AZHBR-së dhe kam përfituar subvencione, të cilat më kanë ndihmuar të ul kostot dhe të rris prodhimin”, shprehet fermeri.

Ministri Salla vlerësoi se raste të tilla dëshmojnë efektet konkrete të mbështetjes për fermerët, duke nxitur investimet, zgjerimin e aktivitetit dhe rritjen e prodhimit vendas.

Ai e cilësoi Krenar Lashin si një shembull të fermerëve që krijojnë vlerë në të gjithë zinxhirin e produkteve bujqësore dhe blegtorale, duke kontribuar në forcimin e produkteve shqiptare në treg.

Burimi ATSH