Ministri i Turizmit, Kulturës dhe Sportit, Blendi Gonxhja ka vijuar turin e inspektimeve në terren me qytetin e Vlorës, ku është shprehur se do të ketë zero tolerancë ndaj zaptimit të hapësirave publike.

Vizita në zonën e Lungomares, u përqendrua në plazhin publik dhe parcelat e përcaktuara si hapësira të lira, ku u konstatuan disa shkelje nga biznese që kishin vendosur çadra dhe shezlongë jashtë territorit të lejuar ose në mbivendosje me hapësirat publike.

Ministri Gonxhja kërkoi lirimin e menjëhershëm të këtyre parcelave dhe theksoi se ndaj çdo subjekti që shkel rregullat do të merren masa ndëshkuese, përfshirë gjoba e sekuestrim të materialeve e pajisjeve.

Të pranishëm në këtë inspektim ishin të pranishëm përfaqësues nga Policia e Shtetit dhe Agjencia Rajonale e Bregdetit Vlorë.

MTKS bëri të ditur se kontrollet nga Agjencia Kombëtare e Bregdetit (AKB) do të vijojnë në të gjithë vijën bregdetare, me qëllim garantimin e aksesit të qytetarëve në plazhet e lira publike dhe respektimin e ligjit.

Burimi ATSH