Zëvendëskryeministrja Albana Koçiu vlerësoi sot se Italia është një nga partnerët tanë më të rëndësishëm ekonomikë dhe tregtarë të vendit tonë.

Koçiu mori pjesë sot në aktivitetin e organizuar me rastin e 10-vjetorit të “Confindustria Albania”, ku vlerësoi një dekadë bashkëpunimi, besimi dhe investimesh konkrete në marrëdhënien mes Shqipërisë dhe Italisë.

Koçiu vlerësoi veçanërisht mbështetjen e Italisë në çdo etapë të zhvillimit dhe të rrugëtimit të vendit drejt familjes europiane.

“Italia është një nga partnerët tanë më të rëndësishëm ekonomikë dhe tregtarë dhe mbi të gjitha një vend mik, që ka qëndruar pranë Shqipërisë në çdo etapë të zhvillimit dhe të rrugëtimit të saj drejt familjes europiane”, u shpreh ndër të tjera Koçiu në fjalën e saj.