Me rastin e 40-vjetorit të vendosjes së marrëdhënieve diplomatike ndërmjet Spanjës dhe Shqipërisë dhe të 20-vjetorit të hapjes së Ambasadës së Spanjës në Shqipëri, u zhvillua në Tiranë konferenca ndërkombëtare “Reflektime dhe pritshmëri për të ardhmen”, e organizuar nga “Albanian Institute for International Studies” dhe Ambasada e Spanjës në Shqipëri.

Në këtë konferencë ishin të pranishëm, Ministri për Evropën dhe Punët e Jashtme të Shqipërisë, Ferit Hoxha, si dhe personalitete të shquara nga fusha politike, diplomatike, kulturore, akademike dhe institucionale. Ndër të pranishmit ishte dhe ish-ministri i Punëve të Jashtme, Besnik Mustafaj dhe ambasadori i parë i Spanjës në Shqipëri, Manuel Montobbio.

Gjatë konferencës u shqyrtua zhvillimi i marrëdhënieve shqiptaro-spanjolle gjatë katër dekadave të fundit dhe u analizuan perspektivat e bashkëpunimit të ardhshëm në sektorë strategjikë si turizmi, energjitë e rinovueshme, infrastruktura dhe investimet spanjolle në Shqipëri.

Në fjalën e tij, ambasadori i Spanjës, Gabriel Cremades, vlerësoi momentin shumë pozitiv që po kalojnë marrëdhëniet dypalëshe dhe theksoi se gjatë këtyre viteve janë konsoliduar lidhjet politike, ekonomike, kulturore, shkencore dhe të sigurisë, të shoqëruara nga një shkëmbim në rritje i vizitave zyrtare, investimeve dhe projekteve të bashkëpunimit.

Po ashtu, Spanja rikonfirmoi mbështetjen e saj të palëkundur për procesin e anëtarësimit të Shqipërisë në Bashkimin Evropian dhe shprehu gatishmërinë për të vijuar bashkëpunimin e ngushtë në fusha prioritare si drejtësia, energjia, bujqësia, shëndetësia, arsimi dhe kultura, me synimin për të kontribuar në zhvillimin, mirëqenien dhe prosperitetin e të dy vendeve.