Ministri i Drejtësisë, Ulsi Manja përshëndeti sot vendimin e Gjykatës Kushtetuese që konfirmoi hartën e re gjyqësore.

Manja u shpreh se, Këshilli i Lartë Gjyqësor dhe Ministria e Drejtësisë do të vazhdojnë të punojnë për implementimin e hartës së re gjyqësore.

“Këshilli i Lartë Gjyqësor dhe Ministria e Drejtësisë do të vazhdojnë të punojnë ngushtësisht si deri më tani, për implementimin e Hartës së Re Gjyqësore me ndihmën e partnerëve tanë, që asistojnë reformën në drejtësi, me qëllim rritjen e eficiencës së sistemit gjyqësor dhe uljen e back log-ut të dosjeve që presin ende gjykimin. Puna vazhdon”, shkroi Manja në një postim në rrjetet sociale.

Në Tiranë, Gjykata Kushtetuese rrëzoi sot kërkesën e Dhomës së Avokatisë dhe Komitetit të Helsinkit për të shpallur si të papajtueshëm me Kushtetutën riorganizimin e rretheve gjyqësore, njohur si Harta e re Gjyqësore, e cila u miratua nga qeveria në korrik të vitit të kaluar.