Shqipëria dhe Bullgaria, si vende të të njëjtit rajon, duhet të shtyjnë më tej bashkëpunimin, jo vetëm politik dhe ekonomik, ku fusha e arsimit të lartë dhe kërkimit shkencor është hapësirë që ofron shumë mundësi.

Zëvendëspresidentja e Republikës së Bullgarisë, Iliana Iotova, gjatë vizitës së saj në Shqipëri, u ndal edhe në Universitetin e Tiranës.

Nën shoqërinë e një delegacioni që përbëhej kryesisht nga përfaqësues të botës akademike, zv.presidentja e Bullgarisë dhe rektori i Universitetit të Tiranës, prof. dr. Artan Hoxha, diskutuan mundësitë dhe nevojën e thellimit të bashkëpunimit, shkëmbimit të studentëve dhe pedagogëve, bashkëpunimin në kryerjen e studimeve dhe kërkimin shkencor.

“Ka një interes në rritje për gjuhët dhe kulturën e vendeve fqinje, ndaj ne duhet të mbështesim dhe nxisim më tej këtë interesim, për të konsoliduar e thelluar bashkëpunimin që ekziston deri më sot, si dhe të hedhim hapa të tjerë në nivel universitar dhe akademik”, tha Hoxha.

Universitetet bullgare dhe shqiptare bashkëpunojnë mes tyre duke zhvilluar programe të përbashkëta trajnimi për studentët dhe doktorantët, si dhe projekte të përbashkëta kërkimore.