Ministrja e Shtetit për Rininë dhe Fëmijët, Bora Muzhaqi priti sot në një takim presidenten e Akademisë Olimpike të Ukrainës, njëherësh dhe zv/presidente e Akademisë Europiane, prof. Maria Bulatova, presidentin e Komitetit Olimpik Kombëtar Shqiptar, Fidel Ylli dhe drejtoreshën e Akademisë Olimpike Shqiptare, Eda Çaushi.

Muzhaqi u shpreh se, në takim u bisedua për programin “Ekipet Sportive në Shkolla”, për finalizimin e suksesshëm të kampionatit të volejbollit e basketbollit, ecurinë me ritme të shpejta të fëmijëve dhe të rinjve, dhe performancën e tyre mahnitëse gjatë kampionatit.

“Emri i Shqipërisë tonë të dashur po jehon nëpër botë falë sportistëve tanë të talentuar që kanë rrëmbyer medalje në disiplina të ndryshme. Paralelisht me këto zhvillime të mëdha edhe sporti tek fëmijët dhe të rinjtë ka marrë jetë dhe ka gjallëruar të gjithë vendin”, theksoi Muzhaqi.

“Të shohësh angazhimin maksimal të fëmijëve dhe të rinjve në sport të ngjall një lumturi të pamasë kur kupton që ëndrra e kaq shumë fëmijëve dhe të rinjve është realizuar dhe së bashku me partnerët kontribues po punojmë për shtrirjen e mëtejshme të këtij programi, për të evidentuar sa më shumë talente, por mbi të gjitha t’u ofrojmë të gjithë fëmijëve dhe të rinjve një jetesë të shëndetshme në përputhje me masat e Strategjisë Kombëtare të Rinisë 2022-2029”, u shpreh Muzhaqi. /ATSH