Kryetarja e Kuvendit, Lindita Nikolla, priti delegacionin e Komisionit të Çështjeve Buxhetore të Komitetit të Përhershëm të Kongresit të RP të Kinës, të kryesuar nga Kryetari i Komisionit, z. Shi Jaobin.

Kryetarja e Kuvendit, Lindita Nikolla, priti sot në mbrëmje delegacionin e Komisionit të Çështjeve Buxhetore të Komitetit të Përhershëm të Kongresit të RP të Kinës, të kryesuar nga Kryetari i Komisionit, Shi Jaobin, i cili po zhvillon një vizitë zyrtare në Shqipëri.

Kryetarja Nikolla vlerësoi marrëdhëniet miqësore e tradicionale me RP të Kinës, shprehu besimin për intensifikimin e mëtejshëm të këtyre marrëdhënieve në çështje me interes reciprok si edhe vlerësoi rolin tepër të rëndësishëm të Kinës si anëtare e përhershme në Këshillin e Sigurimit të OKB-së.

Duke mbështetur intensifikimin e bashkëpunimit ekonomik e tregtar mes dy vendeve, Kryetarja Nikolla shprehu vullnetin e Kuvendit të Shqipërisë për nxitjen e këtij bashkëpunimi në fusha të ndryshme, si energjia, turizmi, teknologjia, infrastruktura, bujqësia etj., si edhe për rritjen e investimeve kineze në Shqipëri, duke shfrytëzuar më mirë mekanizmat ekzistues, si Komisioni i Përbashkët Ekonomik dhe marrëveshjet e bashkëpunimit të nënshkruara dhe ato në proces.

Nikolla vuri në dukje se bashkëpunimi parlamentar përbën një dimension të rëndësishëm për të forcuar lidhjet midis dy vendeve.

Kryetari i Komisionit të Çështjeve Buxhetore të Komitetit të Përhershëm të Kongresit të RP të Kinës, Shi Jaobin, falenderoi Kryetaren e Kuvendit, znj. Nikolla, për pritjen dhe vuri në dukje se gjatë vizitës dhe takimeve në Shqipëri konstatoi dëshirën e përbashkët për të nxitur bashkëpunimin dypalësh, i cili mbështetet në miqësinë tradicionale mes dy popujve tanë. Z. Jaobin vuri në dukje se ritmet e shpejta të rritjes së ekonomisë kineze janë një potencial i rëndësishëm edhe për rritjen e bashkëpunimit ekonomik e tregtar me Shqipërinë.

Kryetari i Komisionit të Çështjeve Buxhetore, z. Shi Jaobin, i përcolli Kryetares Nikolla përshëndetjet e Kryetarit të Kongresit Kombëtar të Popullit të RP të Kinës, z. Li Zhanshu, dhe ftesën e tij për një vizitë zyrtare në Kinë.