Sot u prezantua aplikacioni i Komisionit Qendror të Zgjedhjeve, “KQZ”, një projekt që u realizua me mbështetjen e qeverisë së Zvicrës për KQZ dhe synon rritjen e transparencës së veprimtarisë së institucionit dhe ofron mundësinë për t’i bërë më aktivë zgjedhësit në marrjen e informacionit me interes për ta.

Aplikacioni ofron informacion mbi vendndodhjen e qendrës së votimit, emrin në listën e zgjedhësve, subjektet zgjedhore dhe kandidatët që garojnë në zgjedhjet e datës 14 Maj 2023, të dhëna mbi pjesëmarrjen në kohë reale, si edhe rezultatet zgjedhore.

Aplikacioni “KQZ” është aplikacion pa pagesë që mund të shkarkohet nga çdo telefon smart (Android dhe IOS) dhe ka dy funksione kryesore: të informojë zgjedhësit me procesin zgjedhor dhe t’i japë mundësi atij të raportojë për parregullsitë që konstatojnë gjatë procesit zgjedhor.

Gjithashtu, aplikacioni KQZ do të shërbejë si platformë komunikimi mes KQZ-së dhe komisioneve zgjedhore, për të raportuar mbi ecurinë e procesit të votimit dhe procesit të numërimit të votave.

Të dhënat në këtë aplikacion përpunohen dhe ruhen nga KQZ në përputhje të plotë me parashikimet e ligjit “Për Mbrojtjen e të Dhënave Personale”, si edhe në respekt të të drejtave dhe lirive themelore të njeriut, në veçanti garantimit të së drejtës për jetë private dhe familjare.

Vënia në dispozicion e të dhënave personale të përdoruesit (numri i telefonit për rubrikën Denonco) është i detyrueshëm për verifikimin e denoncimit, por është në dëshirën e çdo individi për të dhënë vullnetarisht informacionin e kërkuar dhe për të vijuar më tej me denoncimin.

Pasi informacioni i raportuar ka mbërritur në serverin e KQZ, kjo e fundit implementon një sistem sigurie të standardeve më të larta për ruajtjen dhe përpunimin e mëtejshëm të këtyre të dhënave, në përputhje të plotë me parashikimet e ligjit “Për Mbrojtjen e të Dhënave Personale”.