Drejtuesi politik i PS-së për qarkun Elbasan, Damian Gjiknuri, gjatë takimi të mbajtur sot me qytetarë të Peqinit, ku ishte i pranishëm edhe kryeministri, njëherazi kryetari i PS-së, Edi Rama, dhe ku u prezantua edhe kandidati për këtë bashki, Bukurosh Maçi, tha se, “nuk është rastësi që ky shesh është kaq plot, sepse ju tashmë ia keni dhënë përkrahjen Bukuroshit dhe PS”.

Gjiknuri tha se, “ju e kuptoni shumë mirë se çfarë do të thotë të administrosh mirë bashkinë, të kesh një kandidat që i di problemet e njerëzve dhe që ka treguar në gjithë detyrat e tij se di të administrojë. Bukuroshi në detyrën e tij të mëparshme ka treguar se di të tërheqë projekte, atë që i ka munguar më parë Peqinit”.

“Në 14 maj vlerësoni edhe politikat e qeverisë Rama, vlerësoni politikën e rritjes së pagave dhe hapja e dritës jeshile, që rritja e pagës mesatare do të ndikojë direkt dhe për përfitimet për pensionistët. Vlerësojeni në mënyrë masive, sepse politika është arti i të mundshmes, është guxim, por ka nevojë dhe për mirënjohje”, u shpreh Gjiknuri.

Ai u shpreh se, “është momenti që i gjithë Peqini dhe Shqipëria të tregojnë mirënjohje. Jam i bindur që në 14 maj Bukuroshi dhe PS do të jenë kampionët e vërtetë në Peqin”.