Kryetari i Komunitetit Mysliman Bujar Spahiu priti në takim ambasadorin e Mbretërisë së Bashkuar, Alastair King-Smith.

Ambasadori Smith e uroi kryetarin Spahiu për Fiter Bajramin dhe e përgëzoi atë, posaçërisht, për fjalimin e mbajtur në ceremoninë e faljes së Fiter Bajramit në sheshin “Skënderbej” më 21 prill 2023.

Ambasadori veçoi mesazhet inkurajuese të kryetarit të KMSH-së në fjalim për investimin në përmirësimin e kushteve social-ekonomike në Shqipëri dhe që të rinjtë shqiptarë ta shohin Shqipërinë si vendin e mundësive për një të ardhme më të mirë.

Gjatë bisedës, Smith vlerësoi gjithashtu bashkëjetesën fetare në vendin tonë dhe kontributin e çmuar të Komunitetit Mysliman të Shqipërisë dhe të liderëve fetare për stabilitetin në vend dhe rajon.

Kryetari Spahiu falënderoi ambasadorin britanik për vizitën dhe fjalët e mira sa i përket mesazheve të tij në Fiter Bajram dhe shtoi se Komuniteti Mysliman i Shqipërisë do të vijojë i palëkundur misionin e tij fisnik në shërbim të përçimit të mesazhit paqësor të islamit dhe në shërbim të kombit shqiptar.

Spahiu e ftoi ambasadorin në pritjen që do të organizohet së afërmi me rastin e 100-vjetorit të themelimit të Komunitetit Mysliman të Shqipërisë, ftesë e cila u pranua me kënaqësi nga ambasadori.