Kryeministri Edi Rama bëri të ditur sot se samiti i ardhshëm i Procesit të Berlinit do të mbahet më 16 tetor të këtij viti në Tiranë.

Data u bë e ditur gjatë konferencës së përbashkët për shtyp të kryeministrit Edi Rama me kancelarin e Republikës Federale të Gjermanisë, Olaf Scholz, në Berlin.

“Gati për një tjetër ngjarje historike, Samiti i Procesit të Berlinit, për herë të parë në rajon, pikërisht në Shqipëri. I jemi mirënjohës, besoj jo vetëm unë, por të gjithë liderët e rajonit, që këtë vit Samiti i Procesit të Berlinit spostohet në rajon, për herë të parë dhe personalisht jam i lumtur që Tirana është zgjedhur si vendi i zhvillimit të këtij samiti”, bëri të ditur kryeministri në konferencën për shtyp nga Berlini.

Sipas Kryeministrit Rama, ky samit, do të jetë një samit që do të vazhdojë në rrugën e çelur, thellimin e procesit, do të trajtojë sigurisht bilancin e arritjeve të këtij procesi dhe patjetër objektivat për të arritur më tutje, si dhe do të fuqizojë bashkëpunimin në rajon edhe më shumë.

“Bashkëpunimi rajonal është e vetmja rrugë që ne kemi dhe në këtë rrugë jemi me fat që Gjermania është një bashkudhëtar i vëmendshëm dhe njëkohësisht një bashkudhëtar i përfshirë drejtpërdrejt”, shtoi Rama.

Rama tha se, në kuadër të Samitit do të mbahet edhe një forum biznesi.

“Më vjen shumë mirë që bashkë me Kancelarin, sot mund të shpallim edhe datën e propozuar nga pala gjermane dhe prej nesh, 16 tetor i këtij viti, ku do të punojmë së bashku, dhe ku zyra e Kancelarit do të angazhohet për ta shoqëruar samitin dhe me një forum të rëndësishëm të biznesit, me praninë e bizneseve të rajonit dhe bizneseve gjermane”, u shpreh Rama.