Ministri i Turizmit, Kulturës dhe Sportit, Blendi Gonxhja njoftoi nisjen e punës për zgjidhjen e disa prej problematikave dhe përgatitjet e sezonit turistik në qytetin e Vlorës, në bashkëpunim me ekipet e Bashkisë dhe të Ministrisë.

Ministri bëri të ditur se, në takimin e zhvilluar me drejtuesit e bashkisë dhe kryetaren Bruna Mersini, u ngritën grupe të përbashkëta pune për të koordinuar veprimet në drejtim të: Verifikimit të nevojës dhe mundësive për vende të ankorimit dhe infrastrukturën mbështetëse për aktivitetet turistike; Koordinim të prioriteteve dhe projekteve në zhvillim, për të garantuar përgatitjen e sezonit turistik që synohet të shtrihet përtej verës si dhe rritjen e standardeve të shërbimeve dhe menaxhimi i plazheve, duke përfshirë pastrimin e tyre dhe përgatitjen e vijës bregdetare për qytetarët dhe turistët.

Gonxhja theksoi gjithashtu rëndësinë e zhvillimit të sektorit kulturor dhe sportiv në funksion të turizmit.

“Muzeumet dhe objektet kulturore do të monitorohen dhe do të bëhet ecuria e investimeve në proces. Gjithashtu po zhvillohen ndërhyrje në Kalanë e Kaninës, ndërsa po punohet për bashkëmenaxhimin e aseteve kulturore, për të krijuar sinergji midis turizmit, kulturës dhe sportit”, tha ministri.

“Vlora meriton më shumë vëmendje dhe mbështetje institucionale. Synojmë të kemi një sezon turistik sa më të organizuar dhe një vit më të suksesshëm, krah për krah me qytetarët dhe aktorët lokalë”, deklaroi Gonxhja.

Ai shtoi se bashkëpunimi mes institucioneve qendrore dhe lokale është thelbësor për të garantuar standardet e shërbimeve turistike dhe kulturore, duke rritur cilësinë e vizitës për pushuesit dhe duke nxitur zhvillimin e qëndrueshëm ekonomik të rajonit.

Ky angazhim institucional vjen në kuadër të përpjekjeve për të bërë të mundur një sezon turistik të gjatë dhe cilësor, duke përmirësuar infrastruktura, shërbimet dhe ofertat për turistët vendas dhe të huaj në qytetin bregdetar të Vlorës.

Marrë nga ATSh