Ambasadori i Italisë në Tiranë, Marco Alberti mori pjesë në ministerialin e Korridorit VIII, të zhvilluar sot në Tiranë nën kujdesin e Ministrisë për Evropën dhe Punët e Jashtme.

Në fjalën e tij, Alberti tha se Italia ka qenë origjina e lançimit të Korridorit të VIII 8, por sië u shpreh ai, “tani është koha të kalojmë nga narrativa tek projekti”.

“Ne kemi folur dhe treguar kaq shumë për këtë korridor duke menduar se vetëm duke treguar për të ndodh, por tani është koha të lëvizim shpejt dhe të kalojmë nga ideja në ekzekutim”, theksoi Alberti.

Ambasadori italian u shpreh se “duhet të lëvizim që korridori VIII të jetë përgjigja e tre gabimeve bazë që ne kemi bërë ose nevojave që ne kemi”.

“E para është nevoja për projektet e përshtatura. Ne nuk kemi nevojë thjesht për projekte që ndodhin në korridorin VIII. Ne duhet të kemi projekte të përshtatura sepse është projekt i përgjithshëm për infrastrukturën por ne na duhen projekte specifike të veçanta për këtë rajon të veçantë. Jemi duke pasur parasysh një përballje mes dy shtyllave botërore”, nënvizoi Alberti.

Sipas tij, ky projekt duhet të jetë specifik dhe i financuar mirë.

“Kur flasim për projektet ne flasim për bankat. Gabimi i dytë që ne kemi bërë është që ne nuk kemi menduar për sinkronizmin. Ne duhet të sinkronizojmë jo vetëm politikat, por edhe industrinë. Asnjë korridor qoftë ky edhe Korridori VIII nuk mund të funksionojë pa një përfshirje të fuqishme ekonomike, por edhe pa një vullnet të mirë politik”, tha Alberti.

Ambasadori italian vuri në dukje se “pika e tretë është se ndoshta do të ketë një nevojë të re për të krijuar siguri përmes Korridorit VIII përtej sigurisë aktuale fizike. Në fakt duhet të flasim për një koncept më të gjerë të sigurisë përmes sinkronizimit dhe bashkëpunimit me sektorin publik dhe privat dhe ekzekutimit të shpejtë të detyrave”.

Burimi ATSH