Ambasadori shqiptar në Kinë, Riza Poda, priti në një takim pune albanologun e njohur kinez, Zheng En Bo, përkthyes të veprave madhore të letërsisë shqipe dhe një prej kontribuesve më të rëndësishëm në promovimin e kulturës shqiptare në Kinë.

Zheng En Bo, anëtar nderi i Lidhjes së Shkrimtarëve dhe mbajtës i Urdhrit “Naim Frashëri i Artë”, është autor dhe përkthyes i dhjetëra botimeve mbi letërsinë dhe kulturën shqiptare, duke i dedikuar gjithë jetën e tij këtij misioni fisnik.

Gjatë takimit, ambasadori Poda e falënderoi për kontributin e çmuar në afrimin e Shqipërisë me publikun kinez dhe e ftoi të angazhohet aktivisht në veprimtaritë kulturore e letrare që selia diplomatike shqiptare do të organizojë, sidomos në nderim të Ismail Kadaresë dhe Dritëro Agollit, veprat e të cilëve ai i ka sjellë me mjeshtëri në gjuhën kineze, bëhet e ditur në njoftimin zyrtar të Ambasadës shqiptare në Kinë.

Zheng En Bo ndau kujtime nga lidhja e tij e hershme me Shqipërinë, foli për projektet aktuale dhe shprehu gatishmërinë për të vijuar bashkëpunimin, me qëllim promovimin e letërsisë dhe kulturës shqiptare te brezi i ri kinez.

Burimi CGTN